Sri Paramahamsarin Apta Mozi – 73

ஸ்ரீ பரமஹம்ஸரின் ஆப்த மொழி – 73

(சென்ற வாரத்தின் தொடர்ச்சி)

wpid-paramahamsarin-apta-mozi.png.png

(முந்தைய பகுதி-மொழி 72: https://swamichidbhavananda.wordpress.com/2016/01/21/sri-paramahamsarin-apta-mozi-72/)

பரமஹம்ஸருடைய பக்தர்களில் ஒருவர் கேதார் என்பவர் ஆவார். அவர் முன்பு ஒரு தடவை பிரம்ம சமாஜத்தில் அங்கத்தினராய் இருந்தார். பிறகு அதைவிட்டு விலகிக்கொண்டார். பக்தி மார்க்கத்தில் போவது அவருக்கு மிகவும் விருப்பமானது. அரசாங்கத்தில் அவர் ஓர் உத்தியோகம் வகித்து வந்தார். உத்தியோகஸ்தராகக் கீழ்வங்காளத்தில் டாக்கா என்னும் நகரில் பல ஆண்டுகள் வசித்திருந்தார். அதுபோழ்து அவர் ‘விஜயகிருஷ்ண கோஸ்வாமி’ என்னும் வைஷ்ணவப் பெரியாரோடு தொடர்பு வைத்திருந்தார். இருவரும் அடிக்கடி சந்தித்து உரையாடிக் கொண்டிருப்பது வழக்கம். பல தடவைகளில் அவர்கள் பரமஹம்ஸரைப் பற்றிப் பேசுவார்கள். பரமஹம்ஸரின் பாரமார்த்திகப் பேரனுபவங்களைப் பற்றிப் பேசிக்கொண்டிருப்பதில் அவர்களுக்குப் பிரீதி மிக உண்டாயிற்று. பாரமார்த்திக விஷயங்களைப் பற்றிப் பேசும்பொழுது அவர் கண்களினின்று ஆனந்தக் கண்ணீர் ததும்புவதுண்டு. டாக்காவினின்று கல்கத்தாவுக்குத் திரும்பி வந்தான பிறகு அடிக்கடி அவர் தட்சிணேசுவரத்துக்கு வந்துவிடுவார்.

தட்சிணேசுவரத்தில் ஒரு நாளெல்லாம் பாரமார்த்திக விஷயத்தில் கழித்தற் பொருட்டு அவர் விரிவான ஏற்பாடு ஒன்று செய்திருந்தார். அன்பர்கள் பலரை ஆங்கு அழைத்திருந்தார். விழாப் போன்ற ஒரு வைபவத்தைக் கொண்டாட அவர்கள் ஆயத்தம் செய்திருந்தார்கள். அதற்காகவென்று பக்தி ரசத்துடன் பாடும் பாடகர் ஒருவரும் ஆங்கு வரவழைக்கப்பட்டிருந்தார். அன்றைய தினம் நல்ல முறையில் கழிக்கப்பட்டது. அதைக் குறித்து கேதார் பெருமகிழ்ச்சியுற்றிருந்தார். அன்று மாலை சுமார் 5 மணி ஆய்விட்டது. அப்பொழுது பரமஹம்ஸ தேவர் பரம்பொருளோடு இணக்கம் வைப்பது எங்ஙனம் என்பது பற்றிப் பக்தர்களுக்கு விரித்தெடுத்து விளக்கிக் கொண்டிருந்தார். “சச்சிதானந்தத்தைச் சுவானுபூதியில் அடையும் ஒருவன் இயல்பாகச் சமாதிநிலைக்குப் போய்விடுகிறான். அப்பொழுது அவனுடைய உலகக் கடமைகளெல்லாம் தாமாகவே நழுவி விழுந்துவிடுகின்றன. இங்கு அமர்ந்திருக்கும் இந்தப் பாடகரைப் பற்றி நான் உங்களோடு உரையாடிக் கொண்டிருக்கிறேன் என்று வைத்துக்கொள்ளுங்கள். எனக்குத் தோன்றியவற்றையெல்லாம் நான் அவரைப் பற்றிப் பகர முற்படுகிறேன். அப்படிப் பேசிக்கொண்டிருக்கின்ற வேளையில் அவர் தாமே இங்கு வந்து சேர்ந்துவிடுகிறார் என்றும் வைத்துக்கொள்ளுங்கள். அதன் பிறகு அவரைப் பற்றிய பேச்சு எதற்காக? அவரைக் கண்டதும் பேச்சு நின்றுவிடுகிறது.”

(தொடரும்…)

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s