Sri Paramahamsarin Apta Mozi – 109

ஸ்ரீ பரமஹம்ஸரின் ஆப்த மொழி – 109

wpid-paramahamsarin-apta-mozi.png.png

(முந்தைய பகுதி – மொழி 108: https://swamichidbhavananda.wordpress.com/2016/10/20/sri-paramahamsarin-apta-mozi-108/)

பத்மலோசன் கதை

ஒரு கிராமத்தில் பத்மலோசன் என்னும் இளைஞன் ஒருவன் வசித்திருந்தான். கிராமத்தார்கள் அவனைப் ‘பத்து’ என்று செல்லப்பெயரிட்டு அழைப்பதுண்டு. இந்தக் கிராமத்தின் ஓர் எல்லைப் புறத்தில் பாழடைந்த கோவில் ஒன்றிருந்தது. அதனுள் மூர்த்திப் பிரதிஷ்டை ஒன்றும் யாரும் செய்து வைக்கவில்லை. அக்கோயிலைச் சுற்றிலும் ஆல் முதலிய காட்டுச் செடிகள் முளைத்திருந்தன. பாழடைந்த நிலையில் அக்கட்டடம் இருந்தது. அதனுள் வௌவால்கள் ஏராளமாகக் குடியிருந்தன. அதன் தரையில் தூசியும் வௌவாலின் எச்சமும் நிறைந்து கிடந்தன. ஆதலால் வழிபாட்டுக்காக என்று அக்கோயிலுக்குள் போவார் யாருமில்லை. ஒரு நாள் மாலை சந்தியாவேளையில் அக்கோயிலிலிருந்து சங்கநாதம் தொனிப்பது ஊரார் காதில் விழுந்தது. ஒருவேளை அக்கோயிலினுள் யாரோ மூர்த்திப் பிரதிஷ்டை செய்திருக்கிறார்கள்; ஆதலால் அங்கு மாலை  சந்தியா பூஜை நிகழ்கிறது என்று ஊரார் எண்ணினார்கள். உடனே அவர்கள் அக்கோயிலுக்குப் புறப்பட்டு ஓடினார்கள். மூடப்பட்டிருந்த கதவில் ஒன்றை இலேசாக யாரோ ஒருவன் தள்ளித் திறந்தான். உள்ளே ஒரு மூலையில் பத்மலோசன் நின்றுகொண்டிருந்தான். சும்மா அவன் சங்கை ஊதிக்கொண்டிருந்தான். கோயிலினுள்ளே மூர்த்திப் பிரதிஷ்டை ஒன்றையும் யாரும் செய்து வைக்கவில்லை. கோயிலை யாரும் பழுது பார்க்கவும் இல்லை. அழுக்குப் படிந்தபடியே இருந்தது. கதவைத் தள்ளித் திறந்தவன் இங்ஙனம் கத்தினான்: “அட மடையா! ஆலயத்தினுள் தெய்வத்தின் விக்ரஹம் ஒன்றும் பிரதிஷ்டை செய்யப்படவில்லை. நீ சும்மா சங்கை ஊதிக் கொண்டிருக்கிறாய். பதினொரு வௌவால்கள் அல்லும் பகலும் இதனுள்ளேயே சுற்றித் திரிகின்றன. கர்மேந்திரியங்கள் ஐந்தும், ஞானேந்திரியங்கள் ஐந்தும், கட்டில் அடங்காத மனதும் தம் போக்கில் உழன்று கொண்டிருக்கின்றன. வெறுமனே கூப்பாடு போடுவதால் குழப்பத்தைப் பெருங்குழப்பமாக்குகின்றாய் நீ.”

உள்ளத்தினுள் கடவுளைப் பிரதிஷ்டை செய்

“பொருளற்ற பாங்கில் கூச்சல் போடாதே. உன் உள்ளத்தினுள் தெய்வத்தைப் பிரதிஷ்டை பண்ணு. மனத்தைத் தூயதாக்கு. தூய மனதில் தெய்வம் தாமாக எழுந்தருளுகின்றார். வௌவாலின் அழுக்கு நிறைந்துள்ள ஆலயத்துக்குள் உபாசனாமூர்த்தி எதையும் யாரும் கொண்டு வருவதில்லை. அழுக்குப் படிந்த மனதும் அத்தகையதே. முதலில் தெய்வத்தை உன்னுடைய உள்ளத்தினுள் பிரதிஷ்டை பண்ணு. பிறகு பிரசங்கங்களை வேண்டியவாறு செய்.

உள்ளத்தினுள்ளே ஆழ்ந்து மூழ்கு. அது ஆழம் நிறைந்த ஆழ் ஆழி. அதன் கீழ்ப்பகுதியில் விலைமதிக்க முடியாத இரத்தினங்களையும் மணிகளையும் காணலாம். அவைகளைப் பெற்றான பிறகு வேண்டியதை நீ செய்வதற்கு முற்படு. ஆனால் மனத்தகத்து ஆழ்ந்து மூழ்க முயலுவார் யாருமில்லை. பாரமார்த்திகப் பெருவாழ்வு வாழ விரும்புவாரும் இல்லை. யமம் நியமத்தோடு கூடிய நல்வாழ்வு வாழ விரும்புபவர்களும் இல்லை. விவேகமும் வைராக்கியமும் அடையப் பெற்றவர்களைக் காண்பதும் அரிது. உண்மையான ஞான வாழ்க்கை வாழ்பவர்களைக் காண்பது அரிதிலும் அரிது. ஆனால் ஏதோ சில புஸ்தகங்களைப் படித்துவிட்டு மேடைப் பிரசங்கிகளாகத் தோன்றியுள்ளவர்களை வேண்டியவாறு காணலாம். பிறர்க்கு ஞானோபதேசம் செய்வது அவ்வளவு எளிதன்று. மனிதன் முதலில் சுவானுபூதியில் கடவுளைச் சாக்ஷாத்கரிக்க வேண்டும். அதன் பிறகு கடவுளிடத்திருந்து அவன் ஆதேசத்தைப் பெற வேண்டும். கடவுளின் ஆதேசத்தைப் பெற்றவனே பிறர்க்குப் போதிக்க வல்லவன் ஆகின்றான்.”

இங்ஙனம் பகர்ந்துகொண்டு பரமஹம்ஸர் தாம் நின்றுகொண்டிருந்த திண்ணையின் மேற்கு மூலையை எட்டினார். அவருக்கு அருகில் மஹேந்திரரும் நின்றுகொண்டிருந்தார். மஹேந்திரருக்கு இப்பொழுது மனதில் குழப்பம் ஒன்று உண்டாயிற்று. விவேகம், வைராக்கியம் என்பன பெண் ஆசை, பொன் ஆசை ஆகியவைகளைத் துறந்துவிடுதல் எனப் பொருள்படுகின்றன. அத்தகைய ஆசைகளை ஒழித்தாலன்றி ஞான வாழ்க்கையில் மனிதனுக்கு முன்னேற்றம் இல்லை என்று பரமஹம்ஸர் பல தடவை வற்புறுத்திச் சொல்லியுள்ளார். ஆனால் தம் நிலைமை எத்தகையது என்பதை அவர் தமக்குள்ளேயே சிந்திக்கலானார். அவருக்கு வயது இப்பொழுது இருபத்தெட்டு. கல்லூரிப் படிப்புகளையெல்லாம் பூர்த்தி பண்ணிவிட்டு ஒரு பள்ளிக்கூடத்துக்குத் தலைமை ஆசிரியராக அமர்ந்திருந்தார். அவர் விவாகம் பண்ணிக்கொண்டவர். குடும்பத்துக்குப் பணியாற்றக் கடமைப்பட்டிருந்தார். விவேகத்தையும், வைராக்கியத்தையும் கடைப்பிடிக்குமிடத்துக் குடும்பகாரியம் நிறைவேறாது. குடும்ப காரியம் நிறைவேறுவது என்றால் விவேகத்தையும், வைராக்கியத்தையும் அடைய முடியாது. தான் எதைச் செய்வது என்று எண்ணி அவர் திகைத்து நின்றார்.

(தொடரும்…)

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s