Swamiji Commemoration Special Article – 2016

மந்திரச் சொல்

Swami Chidbhavananda 2

தூய்மையிலிருந்து ஆற்றல் மிக்க சொற்கள் பிறக்கின்றன. ‘Out of purity comes words of power’ அச்சொற்கள் கேட்போருடைய உள்ளத்தில் ஆற்றலையும், உறுதிப்பாட்டையும் வளர்க்கின்றன. தூய்மையான உள்ளத்திலிருந்து வரும் சொற்களை ஆராய்ச்சி செய்ய வேண்டுவதில்லை. அவற்றை அப்படியே வாழ்க்கையில் கடைப்பிடிக்கலாம். அவற்றை ஆப்த வாக்கியங்கள் என்றும் மந்திர சக்தி வாய்ந்தவைகள் என்று பகரலாம். ஸ்ரீமத் சுவாமி சித்பவானந்தர் அருளிய சொற்கள் ஆக்ஷேபனையின்றிப் பக்தர்கள் முழுமையாக ஏற்றுக்கொள்ளலாம்.

1. பேச்சாற்றல்:

கேட்டார்ப் பிணிக்கும் தகையவாய்க் கேளாரும்

வேட்ப மொழிவதாம் சொல்

எனத் திருவள்ளுவர் சொல் வன்மை பற்றிக் கூறுகிறார். இந்தக் குறளுக்கு விளக்கமாக ஸ்ரீமத் சுவாமி சித்பவானந்தரின் பேச்சாற்றல் அமைந்திருந்தது. இவருடைய பேச்சாற்றலை அனுபவித்த சந்நியாசினி ஒருவரின் அனுபவம்:

“பெரிய சுவாமிஜியுடன் நாங்கள் சிலர் கேரள நாட்டுக்குத் தெய்வப் பயணம் சென்றிருந்தோம். அங்குள்ள பக்தர் சிலரின் அழைப்பை ஏற்று அவர்கள் வீட்டுக்குச் சென்றோம். பக்தர்கள் இவரை வரவேற்பதில் பேரார்வமும், பெருமகிழ்வும் காட்டினர். அவர்களின் பக்தி எத்தகையதாக இருந்தது என்பதை நேரில் கண்டு அனுபவித்தோம். அங்கிருந்து நாகர்கோவில் சென்றிருந்தோம். ஆங்கு ஒரு கல்லூரியில் ஸ்ரீமத் சுவாமி சித்பவானந்தரை அழைத்திருந்தார்கள். நாங்கள் அங்கு சென்றவுடன் கல்லூரி நிர்வாகி இவரிடம், ‘உங்களுடைய பேச்சைக் கேட்பதற்கு நாங்கள் ஆர்வம் உடையவர்களாக இருக்கிறோம். உங்களுடைய பேச்சு மாணாக்கர்களின் முன்னேற்றத்திற்குப் பெரிதும் பயன்படும் என்று நினைத்துத் தங்களை அழைத்தோம். ஆனால், மாணாக்கர்களோ எதிர்ப்புத் தெரிவிக்கின்ற பாங்கில் இருக்கின்றார்கள். ஒரு வேளை கலவரத்தை உண்டு பண்ணிவிடுவார்களோ என்று அஞ்சுகின்றோம். தாங்கள் மாணக்கர்களுடைய நிலையை அறிந்து, அதற்கேற்றவாறு பேச வேண்டும் என்று வேண்டிக்கொள்கின்றோம்.’ என்று கூறினார்.

சுவாமிஜி அதற்கு ‘அப்படியா!?’ என்று கூறிச் சிரித்துக்கொண்டார். கம்பீரமாக மேடையின் மீது நின்று ஆற்றல், அன்பு, அறிவு என்பனவற்றை விளக்கும் பாங்கில் ஒரு மணி நேரம் உணர்வோடு கூடிய அறவுரை ஆற்றினார். கடவுளைப் பற்றிய பேச்சே எடுக்கவில்லை. சுவாமிஜி ஆரம்பிக்கும்பொழுது மாணாக்கர், மாணாக்கியர் சிலர் மன்றத்தின் உள்ளேயும், பலர் வெளியே உள்ள மரத்தின் மேலேயும் அமர்ந்திருந்தார்கள். பேசத் தொடங்கிய சிறிது நேரத்தில் மரத்தின் மேலிருந்த மாணக்க மாணாக்கியர் மரத்திலிருந்து கீழே இறங்கி வந்து மன்றத்தினுள் அமைதியாக அமர்ந்து சொற்பொழிவை மிக்க ஆர்வத்துடன் கேட்டுக்கொண்டிருந்தார்கள். சொற்பொழிவு முடிந்த பிறகு நிர்வாகியும் கல்லூரி முதல்வர், ‘தங்கள் பேச்சை மாணாக்க மாணாக்கியர் ஆழ்ந்து கேட்டனர். தாங்கள் அடிக்கடி வந்து இங்குப் பேச வேண்டும்’ என்று பணிவுடன் கேட்டுக்கொண்டார். கல்லூரியில் உள்ளோர் எங்களிடம் 6 மாதங்களுக்கு ஒரு முறையாவது அவசியம் சுவாமிஜியை அழைத்து வர வேண்டும் என்னும் கருத்தைத் தெரிவித்துக் கொண்டார்கள். இவருடைய பேச்சைக் கேட்ட மாணாக்க மாணாக்கியர் முகங்களில் மகிழ்ச்சி தாண்டவமாடியதைப் பார்த்தோம்.”

2. விஷமே மருந்து:

சிறுமை கண்டு பொங்குதல் பெரியோர் இயல்பு. நாரதர் கலகமும், துருவாசர் கோபமும் நன்மையே விளைவித்தன. சில வேளைகளில் விஷமே மருந்தாகப் பயன்படும். பிறரைத் திருத்தியமைக்கக் கோபத்தைப் பயன்படுத்தும்பொழுது அது அவருக்கு ஆசீர்வாதமாக அமைகிறது. ஒரு சமயம் ஸ்ரீமத் சுவாமி சித்பவானந்தர் நடாத்திய அந்தர்யோகத்தில் ‘சிவபுராணம்’ ஓதும்போது அன்பர் ஒருவர் இடையில் எழுந்து சென்றார். அவருடைய பெயரைக் கூறி அவரைக் கோபத்தோடு நோக்கினார். எழுந்துபோன அன்பர் அமைதியாக அமர்ந்தார். அச்செயலை உடனிருந்து பார்த்த பக்திமதி ஒருவர் இந்நிகழ்வினின்று ஒரு பெரிய பாடத்தைக் கற்றுக்கொண்டார். அன்று முதல்  அந்த பக்திமதி வழிபாடு முடிகின்ற வரையில் இடையில் எழுந்து போவதில்லை. இது அவரும், எழுந்து சென்றவரும் கற்றுக் கொண்ட பாடம்.

3. நடக்கும் போ!:

ஸ்ரீமத் சுவாமி சித்பவானந்தர் தம்மிடம் அருள் நாட்டம் கொண்டு வந்தவர்கள் எல்லாரையும் ஆசீர்வதித்தார். அவரிடம் ஆசி பெற்று அருள்துறையில் பலர் முன்னேற்றம் அடைந்தனர்.  ஒரு சிலர் லௌகிக நோக்கத்துடன் சுவாமிஜியிடம் ஆசீர்வாதம் பெற வருவதுண்டு. காமியப் பிரார்த்தனை சுவாமிஜிக்கு சிறிதும் ஒவ்வாது என்றாலும், அப்படி ஆசி பெற வந்த அன்பர் ஒருவர், “நான் விசைத்தறி போடப் போகிறேன்; நன்றாக நடக்குமா?” என்று கேட்டபோது, “நடக்கும் போ!” என்று கோபமாகச் சொன்னார். சுவாமிஜி கோபமாகச் சொன்னாலும் நன்றாக நடந்து வருகிறது. சுவாமிஜியினுடைய கோபம் லௌகிகத்தைப் பற்றிக் கேட்காதே என்பதை உணர்த்துவதோடு மட்டுமல்லாமல், யாரிடம் எதைக் கேட்கவேண்டும் என்பதையும் புகட்டுகிறது.

4. நடக்காது போ!:

அன்பர் ஒருவர் மலாய் நாட்டு விநாயகர் கோவிலுக்கு இந்தியாவிலிருந்து தேர் செய்யும் பணியை ஏற்றுக்கொண்டு அதனைச் சிறப்பாகவும் செய்து முடித்தார். தேருக்கு உரிய பாகங்களை எல்லாம் முறையாகப் பெட்டியில் அடுக்கிக் கப்பலில் அனுப்பக் கொண்டுபோனபோது, ‘எல்லாப் பார்சல்களையும் பிரித்துப் பார்க்க வேண்டும். இல்லையேல் அனுப்ப முடியாது’ என்று சுங்க அதிகாரிகள் கூறினர். அவ்வாறு பிரித்துக் காட்டினால் தேர்ப்பாகங்கள் பழுதுபடும், உரிய காலத்திலும் மலாய் நாட்டுக்குப் போய்ச் சேராது என்று அதிகாரியிடம் எடுத்துச் சொன்னார். அதிகாரிகள் கேட்காத நிலையில் குழம்பிய மனத்துடன் ஸ்ரீமத் சுவாமி சித்பவானந்தரை அணுகினார். அவர் இச்செய்தியைக் கேட்டு “ஒன்றும் நடக்காது போ” என்று கூறினார். அவ்வாறே இந்தியாவிலும், மலாய் நாட்டிலும் அவை சுங்க அதிகாரிகளால் பிரித்துப் பார்க்கப்படவில்லை. உரிய காலத்தில் தேர் மலாய் நாட்டுக்குப் போய்ச் சேர்ந்தது. நல்ல காரியமானது சுவாமிஜி சங்கற்பித்துக் கூறிய அருளாசியின்படியே இடையூறின்றி நிகழ்ந்ததை இன்றும் எண்ணி எண்ணிப் பெருமகிழ்வு எய்துவதாக அவ்வன்பர் கூறினார்.

5. ஒரு பயனும் ஏற்படாது:

சுவாமி சித்பவானந்தரிடம் பயிற்சி பெற்று வந்த துறவியர்களுள் ஒருவர் சாதனைக்காக நான் உத்திரகாசி சென்று ஆறு மாதம் இருந்துவிட்டு வருகிறேன் என்று கேட்டபொழுது, “அப்படியா! நல்லது. அவ்வாறே அங்கு சென்று சாதனை செய்துவிட்டு வா!” எனக்கூறி அனுமதி வழங்கினார்.

பிறகு பரிவ்ராஜகனாகச் சிறிது காலம் வாழ்ந்து வர விரும்புகிறேன் என்று கேட்டபொழுது, “அவ்வாழ்வினால் உனக்கு ஒரு பயனும் ஏற்பட்டுவிடாது. போனால் புரிந்துகொள்வாய். போய்விட்டுவா!” என்று என் விருப்பத்தை ஆமோதித்தார். அவர் கூறியது முற்றிலும் மெய்யானது என்பது என் பரிவ்ராஜக வாழ்க்கையில் எனக்கு அனுபவம் ஆயிற்று.

6. ‘பொருள் பற்று’ ஒழிய உபாயம்:

சுவாமிஜி நேர்மையான முறையில் பொருளைச் சம்பாதிக்கவும் அவ்வாறே பொதுப்பணிக்கென்று அப்பொருளைச் செலவழிக்கவும் கற்றுக் கொள்ள வேண்டும் என்பதை அன்பர்களுக்கு எடுத்துரைப்பார். ஒரு சமயம் தம்மிடம் பொருளைப் பற்றிய பிரச்சனை ஒன்று வந்தபோது அதனைத் தீர்த்து வைத்த பாங்கு கவனிக்கத் தக்கது. தபோவனத்தில் பயின்ற பழைய மாணவர் ஒருவர் இரும்புக்கடை வைத்திருந்தார். திடீரென்று இரும்பு விலை ஏறியதால் கொள்ளை லாபம் வைத்து விற்கவேண்டிய நிலை ஏற்பட்டது. இரும்பை முன்னைய விலைக்கு விற்றால் அதை வாங்கியவர் பெருத்த லாபத்தை அடைவார். இந்நிலையை எப்படி சமாளிப்பது என ஸ்ரீமத் சுவாமி சித்பவானந்தரைக் கேட்டார். சுவாமிஜி, “ஒருவனுக்கே லாபம் போகக்கூடாது. தற்பொழுது கூடியுள்ள விலைக்கே இரும்பை விற்றுவிடு. வருகின்ற லாபத்தில் உனக்கு உரியதை எடுத்துக்கொள். அதற்குமேல் உள்ள லாபத்தைப் பொதுப்பணியை நன்முறையில் ஆற்றுகின்ற பல நிறுவனங்களுக்குப் பிரித்து நன்கொடையாகக் கொடுத்துவிடு. அந்த லாபம் பலருக்கும் பயன்பட்டால் அது ‘ஈஸ்வர ஆராதனை’ ஆகும். வாணிகத்தில் இது போன்ற எதிர்பாராத வாய்ப்பு அமையும் காலத்தில் உனக்குப் பொருள் பற்று வாராதிருக்க இந்த முறையைக் கையாண்டுவா” என்று அறிவுறுத்தினார்.

7. உன்னை நீ திருத்திக்கொள்:

  • தாமரை இலை நீரில் இருக்கும். ஆனால் அதில் நீர் ஒட்டாது. அது போன்று நீ உலகத்தில் இருக்கலாம். உலகப் பற்று உன் உள்ளத்தில் இருக்கக்கூடாது.

-ஸ்ரீ ராமகிருஷ்ண பரமஹம்ஸர்.

  • நாய் வால் போன்றது உலகம். அதனைத் திருத்த உன்னால் இயலாது. உன்னை நீ திருத்திக்கொள், நீ திருந்துமளவு உலகுக்குப் பயன்படுவாய்.

-சுவாமி விவேகானந்தர்.

இவ்விரண்டு கோட்பாடுகளையும் நடைமுறைக்குக் கொண்டுவரும் சந்தர்ப்பம் ஒருவருக்கு ஏற்பட்டது. தபோவன பழைய மாணவர் ஒருவர் கோவில் நிர்வாக அதிகாரியாகப் பொறுப்பேற்றார். கோவில்களில் நடக்கும் ஊழல்களைப் பார்த்து அவர் மனம் நொந்து கோவில் நிர்வாகத்தை ஒழுங்குபடுத்தும் வழி யாது என்று ஸ்ரீமத் சுவாமி சித்பவானந்தரிடம் கேட்டார். அவருக்கு சுவாமிஜி கூறியது: “கடவுளுக்கு பயந்து நடக்கின்றவர்கள் இப்பொழுது இல்லை. மக்களிடையே இன்று சுயநலம் மிகுந்து லௌகிக மனப்பான்மை அதிகரித்திருக்கிறது. ஆகையால் இன்றைக்குப் பொதுச் சொத்தைத் தமக்கு உடைமையாக்கிக் கொள்கின்றவர்தாம் பெரும்பாலோர் ஆவர். அவர்கள் மீது நீ நடவடிக்கை எடுக்க இயலாது. அப்படி எடுப்பாயானால் சில சமயம் உனக்கே ஆபத்தாக வந்து முடியும். நீ இப்பொழுது செய்ய வேண்டியது என்னவென்றால் உன் அளவில் நீ தூய்மையாகவும், நேர்மையாகவும் நடந்துகொள்வதே ஆகும். உன் நடத்தையைப் பார்ப்பவர் தாம் செய்யும் தவறுகளைக் குறைத்துக் கொள்வர். இதுதான் நீ தற்காலச் சூழ்நிலையில் கோயிலுக்குச் செய்யும் நன்மையாகும்.”

8. சொப்பன தீக்ஷை:

ஆத்ம சாதகர்கள் சிலர் ஸ்ரீமத் சுவாமி சித்பவானந்தரிடமிருந்து மந்திரதீஷை பெற வேண்டும் என்று விரும்பினார்கள். இறைவனுடைய நாமங்கள் யாவும் உச்சரிக்கும்பொழுது மனம் அவற்றில் ஈடுபட்டிருந்தது என்றாலும் இஷ்ட மந்திரம் எது என்பதை அறிந்துகொள்ள முடியாதவராக ஒரு அம்மையார் இருந்தார். ஸ்ரீமத் சுவாமி சித்பவானந்தர் அந்த அம்மையார் கனவில் தோன்றி இஷ்ட மந்திரம் ‘சக்தி நாமம்’ என்பதைக் காட்டித் தந்ததாக அவர் கூறினார்.

9. ஆத்மாவை பட்டினி போடக்கூடாது:

ஸ்ரீமத் சுவாமி சித்பவானந்தர் தம்மை நாடி வந்தவர்களுக்கு வேண்டியதை வேண்டியவாறு வழங்கி வந்தார். அருள் நாட்டம் கொண்டிருந்த அன்பர் ஒருவர் தமக்கு சுவாமிஜி அருள்பாலித்ததைக் கூறியுள்ளார். “வித்யாவனப் பள்ளியில் நான் 20 ஆண்டுகள் மாணவர்களுக்கு தமிழ் மொழி பயிற்றும் பணியைச் செய்து வந்தேன். சுவாமிஜி இயற்றியுள்ள நூல்கள் பலவற்றுக்கு அவரோடு கலந்து உரையாடும் பாக்கியம் எனக்குக் கிடைத்தது. அது அறிவுத்துறையில் முன்னேற்றம் அடைவதற்குத் துணையாக இருந்ததை நான் உணர்கிறேன். ஆனால் பணியில் இருந்தபொழுது என்னை அறியாது என் உள்ளத்தில் ஆன்மீக உணர்ச்சி அரும்பிக் கொண்டிருந்தது. ஓய்வுபெறும் காலம் வரவர அது வெளிப்பட ஆரம்பித்தது. ஓய்வு பெறும் ஆண்டில் என் உள்ளத்தில் வளர்ந்து வந்த ஆன்மீக உணர்வானது சுவாமிஜியிடம் உபதேசம் வாங்கிக் கொள்ள வேண்டும் என்னும் எழுச்சியைத் தூண்டியது. நான் சுவாமிஜியை அணுகி, ‘நான் தங்களிடம் மந்திரோபதேசம் பெற்றுக்கொள்ள விரும்புகிறேன்’ எனக் கூறினேன். அதற்கு சுவாமிஜி, “ஸ்ரீ ராமகிருஷ்ண மடத்துத் துறவியாகிய நான் யாருக்கும் தீட்சை செய்வதில்லை. ‘அவரவர் ஆத்மாவே அவரவர்க்கு ஆத்ம குரு’ என்றாலும் உங்களுக்கு விதிவிலக்கு உண்டு. இப்போதே அமருங்கள்” என்று கூறி மந்திரோபதேசம் செய்தார். என் வேண்டுகோளுக்கிணங்க நான் தந்த ஜபமாலையைச் சிவராத்திரியன்று முதலில் தம் கழுத்தில் அணிந்து, பிறகு இரவு 12 மணி வரையில் தம் கையால் ஜபம் செய்து என் கழுத்தில் தம் கையாலேயே அணிவித்தார். அடுத்த நாள் என்னை அழைத்து ஜபம் செய்ய வேண்டிய முறையைக் கூறி, “இன்று முதல் நீங்கள் வானப்பிரஸ்தர். ஒரு நாள் ஜபம் செய்யாது போனாலும் ஆத்மாவைப் பட்டினி போட்டதாகும். ஆகையால் தினமும் ஜபம் செய்து வாருங்கள்” என்று ஆசீர்வதித்தார்.

நவீன உலகம் எதை விரும்புகிறது, எதைப் பாராட்டுகிறது என்பதற்கு முக்கியத்துவம் தராமல் நவீன உலகுக்கு எது தேவையோ அதையே வழங்கினார். இங்ஙனம் வாழ்வு முழுவதும் விளம்பரத்திற்கு இடந்தராது நடந்துகொண்ட பெருமை ஸ்ரீமத் சுவாமி சித்பவானந்தருக்கு உரியது.

சிங்கத்தின் பராக்கிரமத்தை மற்றொரு சிங்கம்தான் அறிந்துகொள்ள முடியும். அது போன்று சான்றோர் பெருமையை சான்றோர்தான் அறிந்து கொள்ள முடியும். ஏனையோர் அறிந்துகொள்ள முடியாது. சான்றோர் கூட்டத்தில் ஸ்ரீமத் சுவாமி சித்பவானந்தர் ஒருவராவார். ஸ்ரீமத் சுவாமி சித்பவானந்தருடைய பெருமை சிறிய அளவு மேலே தரப்பட்டுள்ளன.

(இன்று பெரிய சுவாமிஜியின் நினைவு தினத்தை முன்னிட்டு பதிவேற்றப்பட்டுள்ள இந்த கட்டுரை சுவாமி நித்தியானந்தர் அவர்கள் இயற்றிய ‘பராய்த்துறை மேவிய பரமபுருஷர்’ புத்தகத்திலிருந்து எடுத்து தொகுக்கப்பட்ட செய்திகளாகும். 2015ஆம் ஆண்டு நவம்பர் 16ல் பதிவேற்றப்பட்ட கட்டுரையை வாசிக்க:

English Article: https://swamichidbhavananda.wordpress.com/2015/11/16/life-history-of-swami-chidbhavananda/

Tamil Article: https://swamichidbhavananda.wordpress.com/2015/11/16/swamiji-commemoration-special-article-2015/ )

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s