Vedantam Thanda Veera Thuravi Swami Chidbhavananda – Tamil Book

பெரிய சுவாமிஜி சித்பவானந்தர் அவர்களைப் பற்றிய விரிவான வாழ்க்கை வரலாறு 3 பாகங்கள் கொண்ட புத்தகங்களாக திருவண்ணாமலை ஸ்ரீ சாரதா ஆஸ்ரமத்தின் நூல் வெளியீட்டுப் பிரிவாகிய ‘ஸ்வாத்யாயா’ வெளியிட்டுள்ளது. பெரிய சுவாமிஜி சித்பவானந்தர் அவர்களிடம் சன்னியாசம் பெற்ற, திருவண்ணாமலை ஸ்ரீ சாரதா ஆஸ்ரமத்தின் தலைவர் யதீஸ்வரி ஸ்ரீ கிருஷ்ணப்ரியா அம்பா அவர்கள், இந்நூலை எழுதியுள்ளார்.

குருவருளாலும், திருவருளாலும் சுவாமி சித்பவானந்தர் அவர்களின் விரிவான வாழ்க்கை வரலாறு மூன்று பாகங்களில், 55 அத்தியாயங்களில், 1728 பக்கங்களில், 300க்கும் மேற்பட்ட அரிய புகைப்படங்களுடன் தயாராகியுள்ளது. இந்நூலை அச்சடிக்கும் பணியின் பூர்வாங்க வேலைகள் குருநாதர் அமரவாழ்வு எய்திய புனித நாளில் – ஐப்பசி மாதம் சுக்ல பட்ச பஞ்சமி – துவக்கப்பட்டன. 6000 பிரதிகள் அச்சடிக்கப்பட்டு புத்தகம் சுவாமி சித்பவானந்தர் அவர்களின் 120வது ஜயந்தி நன்னாள் அன்று (8ஆம் நாள் ஏப்ரல் 2018) இந்த மூன்று பாகங்கள் கொண்ட நூல்கள் வெளியிடப்பட்டன. தற்பொழுது இவை விற்பனையாகி வருகின்றன.

நூலைப் பற்றிய தகவல்கள் சில:

Wrappers

‘வேதாந்தம் தந்த வீரத்துறவி சுவாமி சித்பவானந்தர்’

(விரிவான வாழ்க்கை வரலாறு – 3 பாகங்கள்)

விலை: ₹ 675/- (3 பாகங்களுக்கும்)

Parcel, Courier செலவுகள்: 

₹ 100/- (தமிழ் நாடு).

₹ 130/- (தென்மாநிலங்களுக்கு).

₹ 160/- (வடமாநிலங்களுக்கு).

கிடைக்கும் இடம்:

ஸ்ரீ சாரதா ஆஸ்ரமம்,

58, மணக்குள விநாயகர் தெரு,

சாரதா நகர்,

ரமணாஸ்ரமம் அஞ்சலகம் எதிரில்,

திருவண்ணாமலை – 606 603

தொலைபேசி: 04175 – 235 246, 9442131956, 8610903226.

Email: ykpamba@gmail.com, ssatvmal@gmail.com,

ஆதாரப்பூர்வமான தகவல்களை அளிக்கும் இந்நூல், வாசிப்போரைப் பண்படுத்தும் பல நிகழ்ச்சிகளை உள்ளடக்கியதாய் வெளி வந்துள்ளது. ஆன்மிகக் களஞ்சியமாகவும், தேச பக்தி வளர்ப்பதாகவும், இலக்கிய மரபை ஒத்ததாகவும், கல்வியாளர்களுக்குக் கொடையாகவும், தபோவன, ஸ்ரீ சாரதா கல்வி நிறுவன முன்னாள் இன்னாள் மாணவ, மாணவியர்களின் பள்ளி, கல்லூரி கால நினைவுகளை கண் முன் நிறுத்துவதாகவும் இந்நூல் விளங்குகிறது.

இந்த பதிவினை வாசிக்கும் அன்பர்களுக்கு இந்நூலில் இருக்கும் பல அரிய தகவல்களை இணையதளத்தில் பதிவேற்ற வேண்டும் என்பது எனது(Admin) விருப்பம். இருப்பினும் புத்தகம் வாங்கி வாசிப்பதுதான் சிறந்தது.

இருப்பினும் வாசகர்களுக்கு இந்நூலைப் பற்றி அறிமுகம் செய்வித்தல் பொருட்டு “வாசகருக்குச் சில வார்த்தைகள்” என்ற தலைப்பில் முதல் பாகத்தில் வெளியிடப்பட்டுள்ள அறிமுக உரையை பற்றி சில வார்த்தைகள்….

வாசகர்கள் இந்நூலை எவ்வாறு அணுக வேண்டும் என்பதை இந்நூலாசிரியர் யதீஸ்வரி கிருஷ்ணப்ரியா அம்பா அவர்கள் “வாசகருக்குச் சில வார்த்தைகள்” என்ற தலைப்பில் எழுதியுள்ளார். இதுவரை யாரெல்லாம் பெரிய சுவாமி சித்பவானந்தர் வரலாறை எழுத முயற்சி செய்தனர் என்ற தகவலும், அம்பாவினுடைய இந்த விரிவான வாழ்க்கை வரலாறு வெளி வருவதற்கு முன்பு யாரெல்லாம் பெரிய சுவாமி பற்றி எழுதி புத்தகமாக வெளியிட்டுள்ளனர் என்ற செய்திகளும் ஆதாரப்பூர்வமான தகவல்களாகும். அம்பா, தாம் இந்த நூலை எழுதுவதற்காக சேகரித்த ஆதாரப்பூர்வமான தகவல்களை மிகத் தெளிவாக முதல்நிலை மற்றும் இரண்டாம் நிலை ஆதாரங்கள் என்று பிரித்துக் காட்டுகிறார்.

தமது கருத்துக்கள், உணர்ச்சிகளை “இப்படி சொல்வதை சுவாமிகள் ஏற்பாரா?” என்று தம்மை பூரணமான சோதனைக்கு உட்படுத்தியதாக அம்பா சான்று அளிக்கிறார். சோதனைக்கு உட்படுத்தியதற்கு சாட்சி என்னவென்றால், இந்த புத்தகம் முழுமையும் சுவாமி சதானந்தர் அவர்கள், கொல்லம் ஞானசுந்தரி அம்மாள், திருவண்ணாமலை அன்பர் சகாதேவ் சிங் ஆகியோர் ஒருமுறை சரிபார்த்துள்ளனர் என்பதே. ஹரி  விஜயலட்சுமி அவர்கள் இலக்கிய மரபுக்கு ஒத்ததாய் இந்நூல் இருக்கிறதா என்று விமர்சித்தது மற்றொரு சோதனை. இத்தனை செய்த பிறகும் குற்றம், குறைகள் நுழைய வாய்ப்பு உள்ளது. அவற்றுக்கு நூலாசிரியரே பொறுப்பேற்கிறார். அக்குற்றம், குறைகளை தமக்குத் தெரிவிக்க வேண்டுமென அம்பா கேட்டுக்கொள்கிறார்.

அன்பர்கள், தபோவன – திருவேடக – சாரதா கல்லூரி பழைய மாணவர்கள், இந்நாள் மாணவர்கள் அனைவரும் இப்புத்தகத்தினை வாங்கிப் பயனடையுமாறு அன்போடு கேட்டுக்கொள்கிறோம்.

-Admin.

Advertisements

Question & Answer – 48

ஐயம் தெளிதல்

தத்துவ விசாரம்

கேள்வி எண் 48: ஒரு மனிதன் ஒரு நாளைக்கு எண்ணுகிற எண்ணங்களுக்குக் கணக்கேயில்லை. ஆனால் மனிதன் உயிர் துறக்கும்போது எண்ணுகிற எண்ணம் எதுவோ அதுவாக அடுத்த பிறவி வந்து வாய்க்கிறதென்று கைவல்யத்தில் சொல்லியிருக்கிறது. பகவத்கீதையில் நீண்டநாள் சொர்க்கத்தில் தேவபோகங்களை அனுபவித்துவிட்டுப் புண்ணியம் தேய்ந்த பிறகு மறுபிறவி எடுக்கிறான் என்று சொல்லியிருக்கிறது. ஒவ்வொரு எண்ணத்திற்கும் ஒரு பிறவி எடுத்தாக வேண்டுமா? கைவல்யம், பகவத் கீதை இவைகளில் சொல்லியிருக்கும் மறுபிறப்பைப் பற்றி விளக்க வேண்டுகிறேன்.

பதில்: மனிதனுக்கு வினை இருக்கும் பரியந்தம் பிறவி உண்டு. வினைக்கு மூலகாரணமாய் இருப்பது எண்ணம். ஓர் எண்ணத்தை எண்ணும்பொழுதே சூக்ஷ்ம நிலையில் அது ஒரு வினை ஆய்விடுகிறது. எண்ணத்துக்கு ஏற்றாற்போன்று வாழ்க்கை மாறி அமைந்து வருகிறது. ஸ்தூல சரீரம் ஒன்றில் இருக்கின்ற காலம் முழுதையும் தொகுத்து ஒரு பிறவி என்று சொல்லுவது உலக வழக்கு. ஆனால் தத்துவ பூர்வமாகப் பார்க்குமிடத்து ஓர் எண்ணத்தை எண்ணும்பொழுதே அந்த எண்ணமயமான புதிய பிறவி மனத்தகத்து அம்மனிதனுக்கு அமைந்துவிடுகிறது. எனவே ஒரு நாளில் ஒரு மனிதனுடைய மனதில் எத்தனைவித எண்ணங்கள் வந்தமைகின்றனவோ அத்தனைவிதமான பிறவிகளை அந்தச் சிறிது நேரத்துக்குள் மன அமைப்பில் அவன் எடுத்தவனாகிறான். இப்படி உண்டாகின்ற பிறவிகளைத்தான் கணக்கெடுக்க யாருக்கும் இயலாது.

இனி, ஓர் உடலை உகுக்கின்ற வேளையில் அந்த ஜீவன் அது பரியந்தம் ஆழ்ந்து எண்ணிய எண்ணங்கள் ஒன்றுகூடி மனதுக்கு ஒரு வடிவைத் தருகின்றன. மேற்போக்காக எண்ணிய எண்ணங்களுக்கு ஆங்கு இடமில்லை. கடலில் உண்டாகிய சிற்றலைகள் போன்று அவைகள் மறைந்து போய்விடுகின்றன. மனத்தகத்து உண்டாயிருக்கின்ற ஆழ்ந்த வடிவுக்கு ஒப்ப புதிய ஸ்தூல சரீரம் அமைகிறது. சாகின்றபொழுது தான் விரும்புகிற ஓர் எண்ணம் முன்னிலையில் வந்து நிற்காது. தான் நெடுங்காலம் எண்ணிய எண்ணங்களின் தொகையே முன்னணியில் வந்து நிற்கும். அதற்கேற்ற படி அடுத்த பிறவி அமைகிறது. ஆண்டு முழுதும் செய்த வியாபாரத்தின் தொகுப்பை ஆண்டு இறுதியில் கணக்குப் பார்த்து லாபநஷ்டத்தை முடிவு கட்டுவது போன்று வினையின் தொகையை முன்னிட்டே அடுத்த பிறவி அமைகிறது.

வினைக்கு ஏற்பச் சூக்ஷ்ம சரீரத்தில் வேறு ஒரு நிலையில் ஜீவன் இருப்பதுண்டு. அந்த நிலை இன்பகரமானதாயிருந்தால் அதைச் சொர்க்க வாழ்வு என்கிறோம். துன்பகரமானதாயிருந்தால் நரகம் என்கிறோம். சொர்க்கமும், நரகமும் கனவு உலகங்களுக்கு ஒப்பானவை. ஸ்தூல சரீரத்தின் துணையின்றிக் கனவு நிலையில் இன்பத்தையோ துன்பத்தையோ ஜீவன் அனுபவிக்கின்றான். அந்தச் சரீரம் அனுபவிக்கின்ற இன்ப  துன்பமும் வினைப்பயனேயாம். கனவு முடிந்ததும் அவன் விழித்துக்கொள்வது போன்று சொர்க்க வாழ்வுக்கு ஏற்ற வினை முடிவுறுங்கால் அவ்வாழ்வை முடித்துவிட்டுத் திரும்பவும் மண்ணுலகில் ஒரு மனிதன் பிறக்கிறான். எனவே பல சாஸ்திரங்கள் சொல்லுகின்ற கோட்பாடுகளைத் தொகுத்து ஆராயுமிடத்துத் தனது எண்ணத்துக்கு ஏற்ப மனிதன் தனது வாழ்வை ஓயாது மாற்றி அமைத்துக் கொண்டு போகின்றான். மாறி அமைகின்ற நிலைக்கே மறுபிறப்பு என்று பெயர். எண்ணங்களற்ற பெருநிலையை ஆத்மா அடைந்துவிடுமிடத்து அது முக்தியாகிறது.

தெளிவித்தவர்: ஸ்ரீமத் சுவாமி சித்பவானந்தர்.